Tawar Separo

Takisah urang udik handak tulak ka kota, ngarannya Utuh...
Abahnya Utuh nih bapasan.

Abah : Tuh... Bila ikam tulak ka kota kaina, hati-hati ikam mun handak batutukar barang atawa baju-salawar... Marga dikota urang ma'andak haraga larang-larang, jadi ikam musti manawar separo.. kalo parlu labih dari separo!!!"
Utuh : inggih bah'ai.. Ulun kada bataha tatipu.. biar kada suah ka kota, ulun mangarti haja
Abah : Ingatakan lah... Tawar separo tarus...
Utuh : Hi'ih hah..!! Urang gin tahuai...!!

Tulak'ai Utuh ka kota Banjarmasin... Sampai ka Banjar parut lapar, lalu singgah ka warung makan..

Utuh : Cil.. Barapa nasi sapiring...?
Acil : 5.000 an
Utuh : 2.500 haja gin lah...?
Acil : Uuuu...uuu...uuu.., Kada kawa.. kada bisa.. barugian kami...
Bajauh'ai Utuh kada jadi makan...

Imbahtu batakun pulang Utuh ka warung subalah... Ditawarnya pulang separo... Kada mau jua urang..
Tapaksa Utuh manahan lapar...
"Biar mati kalaparan aku kada pacanghakun makan... Tiwas kada hakun ditawar!!!", jar Utuh sambil bajalan kapasar handak manukar baju.

Pilih-pilih baju lalu batakun haraganya...
Utuh : Mang.. Baju ngini barapaan haraganya mang..?
Amang : Nangitu kah.. 50ribu..!!
Utuh : Salawi ribu haja mang lah..?
Amang : Uuu.. Kada kawa salawi ribu, lamun ikam handak jua maraha 45 ribu
Utuh : Dua puluh dua setangah haja lah..?
Amang : Aii..kanapa baturun manawar..? Tadi salawi ribu, kaya ini haja nah.. Bayari ha 40ribu
Utuh : 20ribu haja lah..!!
Amang : "Naaahh, kanapa pulang maka baturun manawar.? Ikam ni manawarkah mambawai bakalahi kah..?!
Utuh : "kada.. Ulun kada wani bakalahi, ulun ingat pasan abah banar'ai.. Ujar sidin tawar saparu
Amang : (mandam si padagang,lalu mancari akal) "Uuu.. Kaya itu kah.. Ayuja aku maandak haraga baju ini lah supaya ba akuran,, saratus ribu..!!
Utuh : Lima puluh ribu haja lah..?
Amang : Ambil ha, barapa lambar handak..?
Utuh : Dua lambar barapa..?
Amang : 2 lambar saratus ribu
Utuh : Lima puluh ribu haja gin lah..?
Amang : "Muyakkk.. Urang gila sakalinya.. Bajauh gin nyawa..!!